Sistemi i sigurimeve në sektorin e bujqësisë, është një komponentë thelbësore për një sektor më konkurrues, më produktiv e më fitimprurës në Kosovë.

Kështu është shprehur ministri i Bujqësisë, Pylltarisë dhe Zhvillimit Rural, Besian Mustafa, gjatë takimit me drejtorin ekzekutiv të Shoqatës së Sigurimeve të Kosovës, Sami Mazreku, me të cilin kanë biseduar për rëndësinë e sistemit të sigurimeve në sektorin e bujqësisë në Kosovë, si dhe për avancimin e mëtejmë të këtij sistemi në vend.

“Sigurimi i prodhimtarisë bujqësore është segment shumë i rëndësishëm për ta zhvilluar dhe avancuar sektorin e bujqësisë edhe më tej dhe për ta bërë atë më konkurrues”, ka thënë ministri Mustafa.

Ai ka theksuar se një sistem i mirë i sigurimit bujqësor ndihmon padyshim edhe në rritjen e produktivitetit dhe profitabilitetit të fermerëve të Kosovës.

Në anën tjetër, drejtori ekzekutiv i Shoqatës së Sigurimeve të Kosovës, Sami Mazreku, theksoi rëndësinë e sigurimeve në sektorin e bujqësisë, duke vlerësuar tashmë edhe lansimin e sistemit të sigurimeve në Kosovë. ‘Sistemi i sigurimeve në bujqësi ndikon edhe në forcimin e një mjedisi të përshtatshëm, duke rritur në këtë mënyrë edhe aftësitë teknike në zbutjen e rreziqeve që kërcënojnë këtë sektor”, ka thënë ai.

Ndryshe, në fillim të vitit 2019, Ministria e Bujqësisë, Pylltarisë dhe Zhvillimit Rural në bashkëpunim me Korporatën Financiare Ndërkombëtare (IFC), anëtare e Grupit të Bankës Botërore, kanë lansuar sistemin e sigurimeve bujqësore në Kosovë.

 / Shoqata e Sigurimeve të Kosovës /

Shoqata e Sigurimeve të Kosovës

Komiteti i Dëmeve pranë Shoqatës së Sigurimeve të Kosovës ka mbajtur mbledhjen e dytë ku janë diskutuar tema të ndryshme lidhur me dëmet, nevojën për ngritjen e kapaciteteve profesionale të trajtuesve të dëmeve nëpër kompanitë e sigurimeve përmes trajnimeve të ndryshme si dhe specifikat dhe sfidat e trajtimit të kërkesave për shpërblimin e dëmit të evidentuara sipas raportit evropian të aksidentit.

Përfaqësues të të gjitha komiteteve të Shoqatës së Sigurimeve të Kosovës kanë diskutuar në takim lidhur me nevojën dhe domosdoshmërinë e plotësim/ndryshimit të Kushteve të Përgjithshme të Sigurimit të Detyrueshëm nga Autopërgjegjësia, për të përshtatur sa më mirë me nevojat e reja të policëmbajtësve ashtu që të njejtit në vazhdimësi të kenë siguruar përgjegjësinë e tyre gjatë drejtimit të mjetit motorik. / Shoqata e Sigurimeve të Kosovës /